Алматы әкімі Дархан Сатыбалды «Вечерний Алматы» газетінің 90 жылдық мерейтойына орай басылым қызметкерлеріне мемлекеттік марапаттарды табыстады, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Наградалар Мемлекет басшысы Қасым-Жомарт Тоқаевтың тапсырмасымен берілді. Президент құттықтауында басылымның терең тарихы мен ұжымның өлшеусіз еңбегіне жоғары баға берген еді. Марапатқа редакцияның он қызметкері ие болды. Олардың қатарында қаладағы ақпараттық кеңістіктің дамуына сүбелі үлес қосып жүрген тәжірибелі журналистер мен басылым ардагерлері бар.
Дархан Сатыбалды «Вечерний Алматы» газетінің шаһардағы ең беделді әрі оқырман сеніміне ие басылымдардың бірі екенін айтты. Қала әкімі басылым тарихына тоқталып, газет Алматымен түрлі тарихи кезеңнің куәсіне айналғанын жеткізді. Оның айтуынша, газет ұзақ жыл бойы өзектілігін жоғалтпай, оқырман сенімін ақтап келеді.