Қосшы қаласында жаңа пәтерлердің кілттерін салтанатты түрде табыстау шарасы өтті. Әлеуметтік жағынан әлсіз топқа жататын 40 отбасы өздерінің жеке баспанасының иесі болды, деп хабарлайды kazlenta.kz тілшісі Ақмола облысы әкімдігінің баспасөз қызметіне сілтеме жасап.
Жаңа тұрғындарды облыс әкімі Марат Ахметжанов жеке құттықтап, осындай әлеуметтік жобаларды іске асыру аймақ тұрғындарының өмір сапасын арттырудағы маңызды қадам екенін атап өтті.
«Бүгінгі оқиға – тек қана пәтер кілтін табыстау емес, бұл отбасылар үшін жайлы жағдай жасауға және облыс тұрғындарына әлеуметтік кепілдіктерді күшейтуге бағытталған қадам. Біздің өңірде кезекте тұрған азаматтарға, әлеуметтік жағынан осал топтарға, көпбалалы отбасыларға және жетім балаларға жаңа пәтер кілтін беру дәстүрге айналды. Бүгін бұл жаңа пәтерге көшудің эстафетасы Қосшы қаласында жалғасуда», – деді Марат Ахметжанов.
Аймақ басшысы қала тұрғындарын тазалықты сақтауға және өскелең ұрпақты осыған үйретуге шақырды.
Жаңа тұрғындар толық дайын пәтерлердің кілтін алды. Көптеген адамдар жаңа, ыңғайлы және жайлы тұрғын үйдің құндылығын бағалап үлгерді. Солардың бірі – ерекше бала тәрбиелеп отырған Көркем Темірқызы.
«Пәтер үшін және біздің қаламызда болып жатқан барлық өзгерістер үшін алғыс айтамын. Қосшы әр жыл сайын жақсарып келеді, мұнда өмір сүру ыңғайлы әрі жайлы болып жатыр, бұл барлық тұрғындарды қуантады», – деді Көркем Темірқызы.
Айта кетейік, биылдан бастап Бурабай, Сандықтау, Зеренді, Бұланды аудандары мен Қосшы қаласында жалға берілетін және кейіннен меншікке алуға болатын пәтерлер беріліп келеді.