Ақмолалық полицейлер 2 млн теңгеден астам сомаға алтын бұйымдарды ұрлаған бойжеткенді анықтады, – деп хабарлайды kazlenta.kz тілшісі Polisia.kz сайтына сілтеме жасап.
Көкшетау қаласының полиция басқармасына жергілікті тұрғын ұрлық дерегі туралы өтінішпен жүгінді. Жәбірленушінің айғақтарына сәйкес, ол пәтердің кілтін туысына қалдырып, шетелге сапарға кеткен.
Қайтып оралған әйел үйден алтын бұйымдардың ұрланғанын анықтаған: сырғалар, кулон, білезік, түрлі сақиналар, шынжырлы крест. Залал сомасы 2 млн 380 мың теңгені құрады.
Полиция басқармасы аталған дерекке қатысты ҚР ҚК 188-бабының 3-бөлігі (Ұрлық) бойынша сотқа дейінгі тергеуді бастады.
Жедел-іздестіру іс-шараларының нәтижесінде полицейлер күдіктінің жеке басын анықтады. Ол есірткіге тәуелді облыс орталығының 21 жастағы тұрғыны болып шықты.
Жәбірленушінің туысы ретінде күдікті өтініш берушінің тұрғын үйінің кілттеріне еркін қол жеткізіп, алтын бұйымдарды ұрлап кетіп, ломбардқа өткізіп жіберген.
Тергеу барысында болған оқиғаның барлық мән-жайлары және күдіктінің басқа да осыған ұқсас қылмыстарға қатысының бар-жоғы анықталып жатыр.