Криминалдық полиция басқармасы мен Степногорск қаласы полиция басқармасының жедел қызметкерлері жүргізген арнайы операцияның нәтижесінде зергерлік дүкеннің мұқият жоспарланған тонау дерегін анықтады, – деп хабарлайды kazlenta.kz тілшісі Polisia.kz сайтына сілтеме жасап.
Естеріңізге сала кетсек, ағымдағы жылдың 1 мамырында белгісіз біреулер жертөле арқылы дүкенге кіріп, 180 млн теңгеден астам сомаға зергерлік бұйымдарды ұрлап кеткен.
Аталған дерекке қатысты ҚР ҚК-нің 188-бабы 4-бөлігі (Ұрлық) бойынша сотқа дейінгі тергеу басталды.
Резонанстық қылмысты ашу және күдіктілерді ұстау үшін полиция департаменті басшылығының нұсқауы бойынша бірнеше жедел топ құрылып, Ақмола және көрші өңірлердің аумағында бірқатар жедел-іздестіру іс-шаралары жүргізілді.
Қабылданған шаралардың нәтижесінде елордада екі күдікті ұсталды. Олардың 46 және 35 жастағы Астана қаласының тұрғындары екендігі анықталды. Тергеу іс-шараларын жүргізу кезінде ұсталғандардан заттай дәлелдемелер, ұялы телефондар, құралдар мен байланыс құралдары тәркіленді. Сондай-ақ ұсталғандар мініп жүрген көлік тәркіленді.
Қазіргі уақытта қылмыстық істі тергеу жалғасып жатыр. Күдіктілер қамауға алынды.