Бетпен құлаған. Атырауда жекеменшік бақшада бала жарақаттанды. Мұрны мен маңдайы сырылып қалғанын ата-анасы ұлын алуға келгенде кешкісін бір-ақ көріпті. Ал баланың қайдан құлағанын білмекші боп, бейнебақылау жазбасын сұраса, ондағылар көрсетуден бас тартқан. Ата-ана енді ұлының денсаулығына уайымдап отыр. Ал білім ұйымының басшысы "болмашы нәрсеге шу шығардың" деп, бөбекті бақшаға қабылдамай қойған, деп хабарлайды kazlenta.kz тілшісі "Астана" телеарнасына сілтеме жасап.
5 күн өтсе де кішкене Аланның мұрны әлі жазылмаған. Бастапқыда ісіп, қатты қызарып, ауырсынды, - дейді анасы. Балалар ауруханасының жарақат бөліміне апарып, рентгенге түсірген.
"Менің балам әлі сөйлемейді. 2 жасқа да толған жоқ. Содан бері жиі мазасызданып жүр, бір көзінің айналасы қозғала береді. Қазір енді мен дәрігерлерге барып, тексерістен өтіп жүрмін. Жарақат бөліміне барған кезде, полиция менен түсініктеме алған еді. Содан соң учаскелік полиция балабақшаға келген. Содан бері баламды қабылдамаймын деп отыр. Сәуір айына толық төлем жасап қойғанмын", деді Динара Амандықова, ата-ана.
Ұлының денсаулығына алаңдаған анасы Аланның қайдан, қалай құлағанын білгісі келеді. Бірақ ондағылар бейнебақылау жазбасын көрсетуден бас тартқан. Енді ол балабақша қызметкерлерінің кешірім сұраудың орнына, баласын қабылдамай қойғанын түсінер емес. Аймақтағы білім саласындағы сапаны бақылау департаменті жекеменшік бақшалар тізімінен бұл ұйымды таппады. Олар бала тәрбиелеумен заңсыз айналысып отырған болуы мүмкін,- дейді.
«Инкар» балабақшасы бізде базада тіркелмеген, яғни хабарлама жібермеген бізге. НОБД дейміз білім берудің ұлттық деректер қоры бар, онда да бұл балабақша, орталық туралы ешқандай мәлімет жоқ. Яғни өз ісімен заңсыз айналысып отыр деп айтуға болады", деді Ғабиден Төрекешов, облыстық білім саласындағы сапаны қамтамасыз ету департаментінің бөлім басшысы.
Ал ақысы төленсе де, балабақшаға бүлдіршінді қабылдамағаны үшін азаматтық сотқа арыздануға кеңес берді. Полиция бұған қатысты тексеріс бастады.
"Жарақат алған балаға сот медициналық сараптама тағайындалды. Сол сараптаманың қорытындысына сәйкес, тиісті шешімдер шығарылатын болады. Яғни баланың жарақатты қандай дәрежеде алғаны және ол жарақатты неден алғаны туралы сараптама қорытындысы шығатын болады", деді Мейірім Ердәулет, облыстық полиция департаментінің басшысы.
Балабақша әкімшілігімен тілдесе алмадық. Қандай да бір ақпарат алмақшы боп, бірнеше рет бардық. Бірақ, екі қабатты үйде орналасқан жекеменшік бақшанның есігі тарс жабық. Ешкім ашпады. Ал басшысы телефон тұтқасын көтерген жоқ.