Өскемен қаласында өрттен бірнеше адамды құтқарып қалған бейбіт күннің батырлары марапатталды, деп хабарлайды ҚазАқпаратқа сілтеме жасаған kazlenta.kz
ШҚО Төтенше жағдайлар департаменті баспасөз қызметінің мәліметіне сүйенсек, Өскеменде адам жанын ажалдан арашалап қалған азаматтар Төтенше жағдайлар министрінің бұйрығымен марапатталды.
30 қарашада түнгі сағат 02.21-де Бажов көшесіндегі тұрғын үйде өрт шыққан. Шатырдың ағаш құрылымдары, жиһаз, тұрмыстық техника мен жеке заттар жанды. Өрт сөндірушілер келгенше сол маңнан бара жатқан куәгер Рустем Сарипов бірден көрші тұратын Николай Саломаевты оятқан. Екеуі терезені сындырып, түтін тұмшалаған үйден 74 жастағы үй иесін тауып, сыртқа алып шықты.
Дәл осы түні қала тұрғыны Андрей Ильенков Дальневосточная көшесінде отқа оранған үйден үш адамды құтқарып қалған. Оның біреуі бала еді. Бүгін бейбіт күннің батырларына «Төтенше жағдайдағы ерлігі үшін» төсбелгісі салтанатты түрде табысталды.
«Көрсеткен батылдықтарыңыз үшін сіздерге алғыс білдіреміз! Сын сағатта осындай қадамға әркімнің бара бермесі анық. Жерлестеріміздің арасында осындай ержүрек азаматтардың бары қуантады» - деді құттықтау сөзінде ШҚО ТЖД бастығы Ерлан Нұрпейісов.