Ақмола облысының тұрғыны достарымен балық аулауға барып, көлігінен айырылды, деп хабарлайды Polisia.kz.
Ақпараттық медиа-порталдың жазуынша, 9 қарашада Астрахан АПБ-ға 48 жастағы жергілікті тұрғыннан өзіне тиесілі Mercedes-Benz 201D автокөлігінің ұрланғаны туралы хабарлама келіп түскен. Залал сомасы 3 млн теңгені құраған. Жәбірленушінің айтуынша, ол екі танысымен балық аулауға барған. Діттеген жерге жеткен соң бір досымен көлге қарай бет алған. Ал екінші танысы көлікте қалған. Қайтып оралғаннан кейін ер адамдар көлікті де, оның ішінде қалған танысын да таппай қалған.
Автокөлікпен бірге жоғалып кеткен ер адам – Солтүстік Қазақстан облысы Ғ. Мүсірепов атындағы ауданның 33 жастағы тұрғыны. Басылым мәліметінше, қазіргі таңда полиция осы фактіге қатысты Қылмыстық кодекстің 200-бабы (Автокөлікті немесе өзге де көлік құралын ұрлау мақсатынсыз заңсыз иеленіп алу) бойынша сотқа дейінгі тергеп-тексеруді бастаған. Ер адамның орналасқан жерін анықтау бойынша жедел-іздестіру іс-шаралары жүргізілуде.
22-11-2022, 11:07
Достарымен балық аулауға барған Ақмола облысының тұрғыны көлігінен айырылып қалды
Егер мәтінде қате байқасаңыз, оны таңдап, Ctrl+Enter пернелерін басыңыз