Жамбыл облысы әкімдігінің «Дін проблемаларын зерттеу орталығы» КММ-сі, Жамбыл облысы төтенше жағдай департаментінің №2 мамандырылған өрт сөндіру бөлімімен бірлесіп, ағымдағы жылдың 21 қыркүйек күні өрт сөндіру бөлімінің қызметкерлеріне «Діни экстремизм мен терроризмнің алдын алу жолдары» тақырыбында дәріс ұйымдастырды. Аталған іс-шараға 80-ге жуық адам қатысты. Іс-шараға психикалық деңсаулық сақтау орталығының психолог-суицидологы Оксана Калашникова, ДПЗО-ның инспекторы Бексұлтан Бекмолдаев, Һибатулла Тарази мешітінің өкілі Нұрсұлтан Зұлпықаров баяндама жасады.
Алғашқы сөзде Н.Зұлпықаров діннің қоғамымыздағы рөлі туралы және дінде зорлық жоқ екендігін түсіндірді.
Кездесу барысында «Дін проблемаларын зерттеу орталығы» КММ-нің «Діни экстремизмге қарсы насихат» бөлімінің инспекторы, дінтанушы Б.Бекмолдаев: «Діни экстремизм және терроризмнің қоғамға қауіпі қандай? Тыйым салынған террористік топтардың мақсаты неде? Өз таныстарымызға қалай көмектесуге болады?» және т.б. сұрақтарға жауап берді.- «Қазақстан Республикасы өзін зайырлы мемлекет ретінде бекіте отырып, өзінің Конституциясы мен ағымдағы заңнамасында діни бірлестіктер мен мемлекеттің қарым-қатынасы қалыптасатын негізгі қағидаттарды бекітті: діни бірлестіктерді мемлекеттен бөлу, тәрбие мен білім берудің мемлекеттік жүйесін діни бірлестіктерден бөлу қағидаты, заңдылық қағидаты», - деді Б. Бекмолдаев.
Сонымен қатар, арнайы бейнероликтер көрсетіліп, қатысушыларға теріс діни ағымдардың ұйымдарына түсіп кетуі, лаңкестік әрекеттерге шақыратын аудио, бейне, мәтіндік материалдары ғаламтор-ресурстарында жариялаудың, экстремисттік мазмұндағы ақпараттарды әлеуметтік желілерде таратудың жауапкершіліктері туралы түсіндірілді. Қатысушылар тарапынан қойылған сұрақтарға қанағаттарлықтай жауап берілді.