Жамбыл облысының әкімі Бердібек Сапарбаев жұмыс сапарымен Байзақ ауданына барып, дауылдан кейін қалпына келтіру жұмыстарының нәтижелерімен танысты. Сондай-ақ, әлеуметтік нысандарды аралап, құрылыс-жөндеу жұмыстарының барысын тексерді, деп хабарлайды kazlenta.kz.
Екіпіні секунтына 38 метрге жеткен дауылдың салдары толығымен жойылған.
Облыс әкімі Көктал ауылындағы 600 орындық жаңа мектеп құрылысының барысымен танысты. Мердігер – «ТаразҚұрылысИнвест» ЖШС. Бердібек Сапарбаев жұмыс сапасы мен қарқынына қатысты бірқатар ескертулер айтты. Құрылыс басқармасы мен аудандық әкімдікке жұмыс мерзімдерінің сақталуын және сапасын бақылауды қамтамасыз ету тапсырылды. Аймақ басшысы жұмыс қарқынын арттырып, мектепті келесі оқу жылының басталмай тұрып тапсыруды талап етті. Олай болмаған жағдайда мердігерге қатаң шара қолданылатын болады.
Сенкібай ауылында да 100 орындық жаңа мектеп салынуда. Мердігер – «ҚазМұнайҚұрылыс» ЖШС нысанды келесі оқу жылының басына дейін тапсырады.
Бұдан соң облыс әкімі Базарбай ауылындағы А.Пушкин атындағы мектепке барды. Мұнда 76 бала оқиды. Екі қабатты мектеп ғимараты 1951 жылы салынған. Мектеп директоры Ақмарал Қаржауованың айтуынша, мектепте күрделі жөндеу 2017 жылы жүргізілген. 17-18 қарашадағы дауыл кезінде мектептің шатыр зардап шеккен, ол тез арада қайта жөнделіпті.
1967 жылы салынған Көкбастау ауылындағы Амангелді атындағы мектеп те толығымен қалпына келтірілген. Қазір білім ордасында 425 оқушы оқуда.
Бердібек Сапарбаев Жібек жолы ауылындағы 150 орындық мектеп құрылысының барысын да тексерді. Нысан құрылысы осы жылдың қыркүйегінде басталған. Мердігер «Сырым Блеке» ЖШС жұмыстарды 2022 жылдың қаңтарында аяқтауды жоспарлап отыр.
Облыс басшысы жұмыс сапары барысында Байзақ ауылындағы учаскелік полиция пунктінің салтанатты ашылу рәсіміне қатысты. Тұрғын үймен біріктірілген полицияның тірек пунктінде тәулік бойы қызмет атқару және азаматтарды қабылдау үшін қажетті жағдайлар жасалған.
- Биыл еліміз ҚР Тәуелсіздігінің 30 жылдығын атап өтуде. Осы жылдар ішінде мемлекеттің қолдауының арқасында елдің құқық қорғау жүйесі түбегейлі қайта жаңғырды. Біздің ортақ міндетіміз – құқықтық тәртіпті, қоғамдық қауіпсіздікті қамтамасыз ету бойынша жүйелі шараларды жүзеге асыру. Мемлекет басшысы Қасым-Жомарт Тоқаевтың тапсырмасына сәйкес учаскелік инспекторлардың мәртебесін арттыру бойынша шаралар қабылдануда. Биыл Байзақ ауданында 4-ші учаскелік полиция пункті ашылуда. Жыл соңына дейін дәл осындай бесінші пункт пайдалануға беріледі. Енді учаскелік инспекторлар өздеріне сеніп тапсырылған аумақтың тұрғындарымен бірге бір ауылда тұрады, бұл құқық бұзушылықтар мен қылмыстардың алдын алуға және жедел ашуға оң әсер ететін болады. Сонымен қатар, барлық учаскелік полиция қызметкерлері қызметтік көлікпен қамтамасыз етілген, - деп атап өтті облыс әкімі.
Аудан активімен өткен жиында Бердібек Сапарбаев Байзақ ауданының басшылығына халықтың әл-ауқатын арттыру мақсатында бірқатар маңызды міндеттер жүктеп, мемлекеттік бағдарламаларды жүзеге асыру жұмыстарын жеделдетуді тапсырды. Аймақ басшысы экономикалық өсім динамикасын ұстап түру үшін бұдан да көп еңбек ету керектігін баса айтты.
25
Жарияланған күні21 желтоқсан 2021
Жаңалықтарға жазылу