Оралда 20 жастағы полиция сержанты оққа ұшты, - деп хабарлайды Tengrinews.kz тілшісі.
Бұл ақпаратты Батыс Қазақстан облысының полиция департаменті растады.
"3 желтоқсандв сағат 7:40 шамасында Орал полиция басқармасы ғимаратында жауынгерлік қаруды алғаннан кейін 20 жастағы полиция сержанты өз-өзіне қол жұмсады (бекітілген табельдік қарудан оқ атқан)", - деп хабарлады полициядан.
Қызметі барысында ол өзін жақсы жағынан көрсеткен, физикалық тұрғыдан дайын болған. Жұмыс кестесін сақтаған, жұмысқа кешікпеген.
"Бұл дерек 03.12.2021 жылы СДТБТ-де тіркеліп, сотқа дейінгі тергеу басталды.
Оқиғаның себептері мен мән-жайын анықтау үшін қызметтік тергеу басталды, бұл туралы қосымша хабарланатын болады. ҚР ҚІЖК-нің 201-бабы негізінде басқа ақпарат жария етілмейді (сотқа дейінгі тергеп-тексеру деректері жария етуге жатпайды. Олар тек прокурордың рұқсатымен ғана жария етілуі мүмкін, егер бұл тергеу мүдделеріне қайшы келсе және басқа тұлғалардың құқықтары мен заңды мүдделерін бұзумен байланысты болмаса)", - деп толықтырды БҚО ПД баспасөз қызметі.