Астанада еліміздің әртүрлі қалаларынан жиналған 4 пен 18 жас аралығындағы 800-ден астам спортшының басын қосқан National Tour джиу-джитсудан республикалық турнирі өтті, деп хабарлайды kazlenta.kz тілшісі Polisia.kz сайтына сілтеме жасап.
Жарысты Астана қаласының джиу-джитсу федерациясы елордалық полиция департаментінің есірткі қылмысына қарсы іс-қимыл басқармасының қатысуымен ұйымдастырды. Турнир "Астана – есірткісіз қала" бастамасын қолдауға және жас ұрпақ арасында салауатты өмір салтын насихаттауға бағытталды. Жарыс барысында жас спортшылар өздерінің шеберлігін, табандылығы мен жеңіске деген жігерін танытып, татами үстінде бақ сынады. Бастама аясында есірткіге байланысты құқық бұзушылықтардың алдын алуға, сондай-ақ жастардың өз денсаулығы мен болашағына жауапкершілікпен қарауын қалыптастыруға ерекше мән беріледі. Спорт – тәртіп пен төзімділікті қалыптастырып, қайсарлық пен өз күшіне деген сенімді арттыратын маңызды құрал.
Жүйелі жаттығу жастардың күш-қуатын пайдалы арнаға бағыттап, алдына нақты мақсат қойып, оған табандылықпен жетуге үйретеді. Полиция қызметкерлерінің осындай спорттық іс-шараларға қатысуы құқық қорғау органдары мен спорт қауымдастығының өзара ынтымақтастығын нығайтады. Бұл өз кезегінде құқық бұзушылықтардың алдын алуға және жастар арасында салауатты өмір салтын кеңінен насихаттауға мүмкіндік береді. "Астана – есірткісіз қала" бастамасы жас ұрпақтың денсаулығы мен қауіпсіз болашағын қамтамасыз ету жолында спорт ұйымдары мен қоғам өкілдерін ортақ мақсатқа жұмылдыруды жалғастыруда.