Елордада прокуратураның үйлестіруімен қалалық Полиция департаменті ұйымдастырған есірткі қылмысына қарсы айлық жалғасып жатыр. Оның аясында оқушылар арасында веложарыс ұйымдастырылды, деп хабарлайды kazlenta.kz тілшісі Астана әкімдігінің ресми сайтына сілтеме жасап.
Жарысты елордалық полиция мен қала әкімдігі бірлесе ұйымдастырды. Негізгі мақсат – өскелең ұрпақтың есірткіге төзбеушілігін қалыптастыру, жастар мен ата-аналардың назарын нашақорлық мәселесіне аудару, сонымен қатар салауатты әрі белсенді өмір салтын насихаттау.Қатысушылар әртүрлі жас санаттары бойынша бақ сынап, 9 шақырымдық қашықтықты жүріп өтті. Жарыс қорытындысында жеңімпаздар естелік сыйлықтармен және дипломдармен марапатталды.Іс-шара «Астана – есірткісіз қала» ұранымен өтті. Бұл спорт пен қоғам мен мемлекеттік органдардың бірлескен бастамалары жастарды есірткіге тартудың алдын алуға қалай көмектесетінінің айқын үлгісіне айналды.
Айта кетейік, елордада «Заң және тәртіп» қағидаты аясында нашақорлықпен күреске арналған айлық жалғасып жатыр. Құқық қорғаушылар бірлескен рейдтер жүргізіп, оқу орындарында профилактикалық әңгімелер өткізуде, сондай-ақ тыйым салынған заттарды тарататын интернет-ресурстарды анықтау және жою жұмыстарын атқаруда.Мұндай іс-шаралар халықтың ақпараттану деңгейін арттыруға, полиция мен қоғам арасындағы сенімді нығайтуға және есірткі қылмысына, жалпы қоғамдық қауіпсіздікке төнетін қатерлерге қарсы бірлескен күресті күшейтуге зор үлес қосады.