13-19 шілде аралығында «Алматы Арена» спорт кешенінде ересектер арасындағы джиу-джитсудан 10-шы Азия чемпионаты және U16, U18, U21 жас санаттарындағы спортшылар арасында 3-ші жастар Азия чемпионаты өтеді, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Турнир Ju Jitsu Asian Union (JJAU) және Халықаралық джиу-джитсу федерациясының (JJIF), сондай-ақ Алматы қаласы әкімдігінің қолдауымен ұйымдастырылмақ. Чемпионатқа Азия елдерінің ұлттық құрамалары, жетекші спортшылар, жаттықтырушылар, халықаралық дәрежедегі төрешілер мен ұлттық федерациялардың өкілдері қатысады деп күтілуде. Аталған жарыс өңірдегі ең ірі спорттық алаңдардың біріне айналып, халықаралық спорттық ынтымақтастықты дамытуға ықпал етеді.
Жарыстар Jiu-Jitsu, Fighting, Duo Classic, Show System, Ju-Jitsu Contact және Para Jiu-Jitsu бағыттары бойынша өтеді. Чемпионат қорытындысы бойынша спортшыларға Халықаралық джиу-джитсу федерациясының рейтингтік ұпайлары беріледі, бұл турнирдің халықаралық спорт аренасындағы маңызын арттыра түседі.
Чемпионат аясында халықаралық төрешілер семинарлары, допингке қарсы білім беру бағдарламалары, алғашқы медициналық көмек көрсету, спортшылардың құқықтарын қорғау мәселелері бойынша оқыту шаралары және ұлттық федерациялар өкілдерінің қатысуымен техникалық кеңестер өткізу жоспарланған.
Ұйымдастырушылардың айтуынша, чемпионаттың Алматыда өтуі қазақстандық джиу-джитсудың жоғары деңгейде дамып келе жатқанын және халықаралық спорт қауымдастығының Қазақстанға ірі халықаралық жарыстарды ұйымдастырушы ел ретінде сенім білдіретінін көрсетеді.
Алматы тұрғындары мен қала қонақтарын чемпионат қатысушыларына қолдау көрсетіп, Азияның ең мықты спортшыларын біріктіретін жарқын спорт мерекесінің бір бөлігі болуға шақырамыз.