Алматыдағы Қазақ ұлттық қыздар педагогикалық университетінде студенттік өзін-өзі басқару мен жастардың ашық пікір алмасуына арналған Студенттік құрылтай құрылды. Оның құрамына 40-тан астам студент кірді. Алғашқы отырыста қатысушыларға Құрылтайдың тұжырымдамасы мен төрағалыққа ұсынылған кандидаттар таныстырылып, кейін төраға сайлауы өтті, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Іс-шараға университет басшылығы, Алматы қаласы Жастар саясаты басқармасының басшысы Азиз Кажденбек, жастар ұйымдарының өкілдері мен студенттік белсенділер қатысты.
Студенттік құрылтай студенттерді толғандыратын мәселелерді көтеріп, ұсынысы мен бастамасын ортаға салуға, оларды жүзеге асыруға атсалысуға және университет пен қала құрылымдарымен ашық пікір алмасуға жол ашады.
Алматы қаласы Жастар саясаты басқармасының басшысы Азиз Кажденбектің айтуынша, студенттік өзін-өзі басқаруды дамыту жастарға өзін толғандыратын түйткілдерді көтеріп қана қоймай, олардың шешімін табуға тікелей атсалысуға мүмкіндік береді.
«Бүгінде жастар студенттік өмірге қатысты шешімдерге сырттай бақылаушы болып қалмай, белсенді араласуы маңызды. Студенттік құрылтай – өзекті мәселелерді ашық айтып, бастама көтеруге, жауапкершілікті мойынға алып, ортақ шешім іздеуге мүмкіндік беретін орта. Осындай тетіктер арқылы Алматы мен еліміздің дамуына үлес қосуға дайын, белсенді әрі жауапты азаматтардың жаңа буыны қалыптасады», – деді Азиз Кажденбек.
Университет ректоры Бейбітгүл Кәрімованың айтуынша, студенттердің құқықтық сауатын арттыру, академиялық адалдық қағидаларын сақтау, экологиялық мәдениетті қалыптастыру және қоғамға пайда келтіруге ұмтылу – жастармен жүргізілетін тәрбие жұмысының негізгі бағыттарының бірі.
«Сапалы білім, денсаулық пен әл-ауқат, гендерлік теңдік, экологиялық мәдениет және әлеуметтік жауапкершілік студенттердің күнделікті өмірімен ұштасып, жастардың қоғамның тұрақты дамуына қатысуына мүмкіндік береді. Бүгінгі студент – болашақ маман ғана емес, елдің қоғамдық дамуына үлес қоса алатын азамат. Біз Студенттік құрылтайды жастардың үнін естуге, өзекті мәселелерді ашық талқылауға және студенттердің бастамаларын қолдауға мүмкіндік беретін маңызды диалог алаңы ретінде қарастырамыз», – деді Бейбітгүл Кәрімова.
Іс-шара барысында Алматыдағы Құрылтай сайлауын ұйымдастыруға атсалысқан белсенді жастар да марапатталды. Жастар ұйымдары, қоғамдық бірлестіктер, жоғары оқу орындары мен комьюнити орталықтардың өкілдеріне қала әкімінің Алғыс хаты табысталды.
Студенттік құрылтай жастарды ортақ мақсат пен бастамалар төңірегінде біріктіріп, олардың көшбасшылық қабілетін шыңдауына және шаһардың қоғамдық өміріне белсенді араласуына жол ашатын тұрақты ұйымға айналмақ.