Елордадағы Роза Бағланова атындағы «Қазақконцерт» мемлекеттік академиялық концерттік ұйымында баян мен аккордеон орындаушыларының 79-шы халықаралық Coupe Mondiale байқауы басталды, деп хабарлайды kazlenta.kz тілшісі Астана әкімдігінің ресми сайтына сілтеме жасап.
Coupe Mondiale – баян және аккордеон өнеріндегі әлемдегі ең беделді байқаулардың бірі. Ол Қазақстан мен Орталық Азияда алғаш рет өткізіліп отыр.
Салтанатты ашылу рәсімінде Мәдениет және ақпарат вице-министрі Айбек Сыдықов байқауға қатысушылар мен қонақтарға Премьер-министрдің орынбасары – Мәдениет және ақпарат министрі Аида Балаеваның құттықтау хатын табыстады.
«Бұл – Қазақстан үшін ғана емес, бүкіл Орталық Азияның мәдени өміріндегі айтулы оқиға. Байқау көптеген жылдар бойы әлемнің үздік орындаушыларынң басын қосып, кәсіби шеберлік пен шығармашылық ізденістің беделді алаңына айналды. Биыл әлемнің 40-қа жуық елінен танымал шеберлер мен талантты жастардың, сарапшылар мен ресми делегация өкілдерінің қатысуы оның халықаралық мәртебесінің жоғары екенін көрсетеді. Халықаралық аккордеоншылар конфедерациясының басшылығы мен беделді өкілдерінің елімізге келуі Қазақстанның мәдени әлеуетіне деген жоғары сенімнің тағы бір дәлелі. Бұл қазақстандық жас музыканттарға жаңа мүмкіндіктер ашып, кәсіби шеберлігін жетілдіруге, халықаралық тәжірибе алмасуға және әлемдік сахнаға шығуға жол ашады деп сенемін», – делінген құттықтау хатында.
Салтанатты рәсім аясында «Астана сазы» қазақ мемлекеттік фольклорлық ансамблі мен «Бірлік» би ансамблі өнер көрсетіп, ұлттық музыка мен хореографияны тоғыстырған аспаптық-хореографиялық композиция ұсынды. Сондай-ақ концерттік бағдарламада Қазақстанның еңбек сіңірген қайраткерлері Нұрболат Арзамас пен Клара Төленбаева өнер көрсетті.
Биыл байқауға қатысу үшін 147 өтінім түскен. Оның 126-сы жеке орындаушылардан, 21-і ансамбльдерден қабылданған.
Байқауға Қазақстан атынан 40 қатысушы өнер көрсетеді. Сонымен қатар Қытай, Ресей, Италия, Португалия, Черногория, Сербия, Хорватия, Швейцария, Жапония, Өзбекстан, Бразилия, Босния және Герцеговина, Қырғызстан, Солтүстік Македония және Беларусь елдерінің музыканттары қатысып жатыр.
Халықаралық байқау 27 тамызға дейін жалғасады.