Атырау қаласында жол қозғалысы қауіпсіздігін қамтамасыз ету және жол-көлік оқиғаларының алдын алу мақсатында патрульдік полиция батальонының қызметкерлері күшейтілген режимде қызмет атқарып, рейдтік іс-шаралар жүргізуде, - деп хабарлайды kazlenta.kz тілшісі Polisia.kz сайтына сілтеме жасап.
Өткен аптада полиция қызметкерлері көлік құралын масаң күйде басқарған 19 жүргізушіні анықтады. Әрбір дерек бойынша қолданыстағы заңнамаға сәйкес тиісті шаралар қабылданды. Масаң күйде көлік жүргізу – жүргізушінің өз өмірі мен денсаулығына ғана емес, жол қозғалысының басқа да қатысушыларына қауіп төндіретін өрескел құқық бұзушылық.
Полиция жүргізушілерді алкогольдік немесе өзге де масаң күйде көлік құралын басқармауға, сондай-ақ масаң күйдегі адамның көлік тізгініне отыруына жол бермеуге шақырады. Жол қозғалысы қауіпсіздігін қамтамасыз ету бағытындағы рейдтік іс-шаралар тұрақты түрде жалғасуда. Полиция қызметкерлері мас жүргізушілерді анықтауға және жол-көлік оқиғаларының алдын алуға ерекше назар аударуда.