Абай облысында полицейлер есірткілік масаң күйде көлік басқарған жүргізушіні тоқтатты, - деп хабарлайды kazlenta.kz тілшісі Polisia.kz сайтына сілтеме жасап.
Абай облысының полицейлері жол қозғалысы қауіпсіздігін қамтамасыз ету және азаматтардың өмірі мен денсаулығын қорғау бағытындағы профилактикалық жұмыстарды тұрақты түрде жүргізіп келеді. Кезекті таңғы патрульдеу барысында тәртіп сақшылары күдік тудырған Mazda 626 автокөлігін байқап, тоқтатты. Көлік тізгініндегі 49 жастағы азаматтың құжаттарын тексеру кезінде полицейлер оның мінез-құлқынан күмәнді белгілерді байқаған. Жүргізушіден алкоголь иісі сезілмегенімен, оның қимыл-қозғалысы мен сөйлеу мәнерінен масаңдық белгілері байқалды. Медициналық куәландыру қорытындысы жүргізушінің есірткілік масаң күйде болғанын растады. Аталған дерек бойынша жүргізушіге қатысты әкімшілік іс қозғалып, материалдар соттың қарауына жолданды. Көлік арнайы айыптұраққа қойылды.
Полиция масаң күйде көлік басқару жол қозғалысына қатысушылардың өмірі мен денсаулығына тікелей қауіп төндіретінін ескертеді. Қолданыстағы заңнамаға сәйкес, алкогольдік, есірткілік немесе токсикологиялық масаң күйде көлік басқарғаны үшін, сондай-ақ осындай жағдайда көлік басқаруды басқа адамға бергені үшін әкімшілік жауапкершілік қарастырылған. Мұндай құқық бұзушылық үшін 15 тәулікке дейін әкімшілік қамауға алу және 7 жыл мерзімге көлік құралын басқару құқығынан айыру түріндегі жаза қолданылуы мүмкін. Жолдағы қауіпсіздік әр жүргізушінің жауапкершілігінен басталады. Масаң күйде рөлге отыру – заң талаптарын бұзу ғана емес, өз өмірің мен өзге де жол қозғалысына қатысушылардың өмірін қатерге тігу. Полиция жүргізушілерді жол қозғалысы қағидаларын қатаң сақтауға және көлік басқару кезінде жоғары жауапкершілік танытуға шақырады. Қандай жағдай болмасын, мас күйде рөлге отырмаңыз.