Жетісу облысында түнгі уақытта отшашу ұйымдастырған азамат жауапқа тартылды, - деп хабарлайды kazlenta.kz тілшісі Polisia.kz сайтына сілтеме жасап.
Әлеуметтік желілерде Талдықорған қаласының Қаратал шағынауданындағы мейрамханалардың бірінің маңында мерекелік іс-шара кезінде отшашу мен пиротехникалық бұйымдар қолданылғаны бейнеленген видео таралуда. Мұндай әрекеттер тұрғындардың тыныштығын бұзып, айналадағы адамдарға қолайсыздық туғызады әрі қоғамдық тәртіпке кері әсер етеді. "Заң мен тәртіп" қағидатын іске асыру аясында полиция қызметкерлері аталған дерек бойынша жедел тексеру жүргізіп, құқық бұзушыны анықтады.
Нәтижесінде 19 жастағы жергілікті тұрғын пиротехникалық бұйымдарды пайдалану талаптарын бұзғаны үшін әкімшілік жауапкершілікке тартылды. Полиция пиротехникалық бұйымдарды пайдалану кезінде заң талаптарын қатаң сақтауға және айналадағы азаматтардың тыныштығы мен қауіпсіздігіне құрметпен қарауға шақырады. Полиция тұрғындар мен қала қонақтарын қоғамдық тәртіпті сақтауға, заң талаптарын құрметтеуге және өзгелердің тыныштығын бұзатын әрекеттерден аулақ болуға үндейді.