Петропавлда қауіпті дрифт жасаған жүргізуші алты айға көлік жүргізу құқығынан айырылды, деп хабарлайды kazlenta.kz тілшісі Polisia.kz сайтына сілтеме жасап.
Петропавл қаласында сағат 15:30 шамасында Интернациональная және Жамбыл көшелерінің қарқынды қозғалысы бар қиылысында BMW автокөлігінің жүргізушісі оңға бұрылу кезінде қауіпті дрифт жасаған. Соның салдарынан көлік қарсы қозғалыс жолағына шығып кетіп, жол-көлік оқиғасына себеп бола жаздаған. Өз жолағына қайта оралуға әрекеттенген жүргізуші басқа көлік құралдары мен жаяу жүргіншілердің қозғалысына да кедергі келтірген. Патрульдік полиция батальонының қызметкерлері бейнебақылау инспекторларымен бірлесіп, құқық бұзушының көлігін тоқтатты. Оның 22 жастағы Петропавл қаласының тұрғыны екені анықталды. Жүргізушіге қатысты қарсы қозғалыс жолағына шыққаны үшін әкімшілік материал рәсімделді. Әкімшілік соттың шешімімен ол алты ай мерзімге көлік құралын басқару құқығынан айырылды. Автокөлік арнайы тұраққа қойылды.
Тексеру барысында жүргізушінің биылғы мамыр айында көліктің шығару жүйесін заңсыз қайта жабдықтағаны үшін әкімшілік жауапкершілікке тартылғаны анықталды. Алайда ол заң талаптарын орындамай, анықталған кемшілікті жоймаған. Заңнамаға сәйкес, мұндай құқық бұзушылық бір жыл ішінде қайталанса, 20 айлық есептік көрсеткіш мөлшерінде айыппұл салынады. Жыл басынан бері Солтүстік Қазақстан облысында полицейлер 120 мыңнан астам жол қозғалысы қағидаларын бұзу фактісін анықтады. Оның ішінде қарсы қозғалыс жолағына шығудың 90, жаяу жүргіншілерге жол бермеудің 1084 дерегі тіркелді. Бұдан бөлек, 594 мас жүргізуші ұсталды. Құқық бұзушылықтардың басым бөлігі аппараттық-бағдарламалық кешендердің көмегімен анықталған. Атап айтқанда, олардың көмегімен жылдамдық режимін бұзудың 70 мыңға жуық фактісі тіркелді. Полицейлер жол қозғалысына қатысушыларды Жол қозғалысы қағидаларын қатаң сақтауға, өзара құрмет танытуға және жолдағы адамдардың өмірі мен денсаулығына қауіп төндіретін әрекеттерге жол бермеуге шақырады.