Алматының Бостандық ауданында кәсіпкерлермен кездесу өтіп, онда «Eco Almaty» ЖШС мамандары Атмосфералық ауаны қорғау қағидаларының талаптары туралы айтып берді, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Кездесуге қатысушыларға газ тартылған аудандарда қатты және сұйық отынды пайдаланудан бас тартудың, шығарындыларды тазарту жүйелерін орнатудың және экологиялық талаптарды сақтаудың маңыздылығы түсіндірілді.
Тексеру барысында экологтар шағын және орта бизнеске тиесілі 202 нысанды қамтыды. Оның ішінде дәмхана мен мейрамханалар, техникалық қызмет көрсету станциялары және монша кешендері бар. Тексеру нәтижесінде олардың үштен біріне жуығы әлі де қатты отынды пайдаланып отырғаны анықталды. Оның ішінде 52 қоғамдық тамақтану орны, 8 монша және 1 техникалық қызмет көрсету станциясы бар. Бұл нысандардың атмосфераға шығаратын ластаушы заттарының жалпы көлемі 617 тоннадан асты.