Маңғыстау облысының әкімі Нұрдәулет Қилыбай Ақтау қаласындағы Азаматтарды қабылдау орталығында тұрғындарды жеке мәселелері бойынша қабылдаді. Қабылдау алдын ала жазылу және кезектілік тәртібімен өтті, деп хабарлайды Маңғыстау облысы әкімінің баспасөз қызметі.
Қабылдау барысында тұрғындар әлеуметтік маңызы бар түрлі мәселелерді көтерді. Өтініштердің басым бөлігі жұмыспен қамту, жаңа жұмыс орындарын ашу, тұрғын үймен қамтамасыз ету және әлеуметтік бастамаларды іске асыру мәселелеріне қатысты болды.
Өңір басшысы әрбір тұрғынның өтінішін мұқият тыңдап, барлық мәселе қолданыстағы заңнама аясында жан-жақты қаралатынын атап өтті. Көтерілген мәселелер бойынша облыстық басқармаларға, қала және аудан әкімдіктеріне нақты тапсырмалар берілді.
Нұрдәулет Қилыбай халықпен тиімді кері байланысты қамтамасыз ету және азаматтардың өтініштеріне жедел ден қою жергілікті атқарушы органдар қызметінің басым бағыттарының бірі екенін айтты. Оның сөзінше, тұрғындармен ашық диалог өзекті мәселелерді дер кезінде анықтап, оларды шешуге бағытталған тиімді басқарушылық шешімдер қабылдауға мүмкіндік береді.