Маңғыстау облысының әкімі Нұрдәулет Қилыбай Үкімет отырысында өңірдегі сумен қамтамасыз ету және су бұру жүйелерін дамыту бойынша жүргізіліп жатқан жұмыстар туралы баяндады, деп хабарлайды kazlenta.kz тілшісі Үкіметтің баспасөз қызметіне сілтеме жасап.
Ол Ақтау қаласындағы «Каспий» су тұщыту зауытының 2-кезеңі және МАЭК (ЦУВС-2) аумағында қуаттылығы 6,0 мың су тұщыту қондырғысы іске қосу есебінен, Ақтау қаласының ауыз су көлемі тәулігіне 58 мыңнан 84 мың текше метрге дейін артқанын, бұл Ақтау қаласы мен оған іргелес елді мекендерді ауыз сумен толық әрі үздіксіз қамтамасыз етуге мүмкіндік беретінін атап өтті.Облыстың халық санының артуын ескере отырып, су тұщыту зауыттарын салу және қондырғыларын орнату бойынша 6 жобаны жүзеге асыру жоспарланған болатын. Оның ішінде құны 130,8 млрд теңгені құрайтын З жоба 2025 жылы пайдалануға берілді, — деді Нұрдәулет Қилыбай.Су бұру жүйелері бойынша Ақтау қаласындағы кәріз-тазарту құрылыстарының қуатын 30,0 мың м³-тен 70,0 мың м³-ке дейін ұлғайту жобасы жүзеге асырылды. Қазіргі уақытта Ақтау қаласының сумен жабдықтау желілерін кезең-кезеңімен қайта жаңарту жүргізілуде. I кезең аясында жалпы құны 8,9 млрд теңгені құрайтын 18 жоба жүзеге асырылды. Нәтижесінде тозу деңгейі 83%-дан 72%-ға дейін төмендеді. II кезең шеңберінде тозу дәрежесін 72%-дан 53%-ға дейін төмендету жоспарлануда.