Алматы әкімі Дархан Сатыбалды Тәжікстан Республикасының Хатлон облысының төрағасы Саид Давлаталимен кездесіп, екіжақты ынтымақтастықты одан әрі дамыту мүмкіндіктерін талқылады.
Тараптар екі ел басшылары деңгейінде қол жеткізілген уағдаластық сауда-экономикалық, инвестициялық және көлік-логистикалық ынтымақтастықты кеңейтуге берік негіз қалыптастырып отырғанын атап өтті.
Дархан Сатыбалдының айтуынша, 2025 жылдың қорытындысы бойынша Алматы қаласы мен Тәжікстан арасындағы сыртқы сауда айналымы 347 млн АҚШ доллары болып, 2024 жылмен салыстырғанда 17,5 пайызға өсті.
Бүгінде Алматыда тәжік капиталы бар 226 кәсіпорын жұмыс істейді. Олар өңдеу өнеркәсібі, құрылыс, көтерме және бөлшек сауда, көлік, қаржы қызметі және қызмет көрсету салаларын қамтиды.
Өз кезегінде Саид Давлатали Алматының Тәжікстан өнімдері, оның ішінде ауыл шаруашылығы тауарлары үшін ірі тұтыну нарығы екенін атап өтті. Оның айтуынша, алдағы екі күнде Алматыда Хатлон облысының тауар өндірушілері қатысатын үшінші ауыл шаруашылығы жәрмеңкесі өтеді.
Ол бұл іс-шара Хатлон облысының өндірушілері мен Алматының бизнес қауымдастығы арасындағы тікелей әріптестікті нығайтудың тиімді алаңына айналатынын жеткізді.
Кездесу қорытындысы бойынша тараптар экономикалық және гуманитарлық ынтымақтастықты тереңдетуге бағытталған бірлескен бастамаларды іске асыру бойынша жұмысты жалғастыруға ниетті екенін растады.