Халықаралық балаларды қорғау күніне орай Жетісу облысы полициясының қызметкерлері кәмелетке толмағандарды бейімдеу орталығына барып, тәрбиеленушілерді мерекемен құттықтады, – деп хабарлайды kazlenta.kz тілшісі Polisia.kz сайтына сілтеме жасап.
Іс-шара барысында балаларға дене шынықтыру және спортпен шұғылдануға арналған спорттық құрал-жабдықтар табысталды. Бұл сыйлықтар балалардың салауатты өмір салтын ұстануына, спортқа қызығушылығын арттыруға және бос уақытын тиімді өткізуіне ықпал етеді. Мерекелік кездесудің ерекше бөлігі ретінде жылдам қимылдайтын арнайы жасақ қызметкерлері көрсетілім қойылымын ұйымдастырды.
ЖҚАЖ қызметкерлері өздерінің кәсіби даярлық деңгейін көрсетіп, арнайы бөлімшенің қызметі туралы әңгімелеп, балалардың сұрақтарына жауап берді. Іс-шара көтеріңкі көңіл-күй мен жылы атмосферада өтті. Тәрбиеленушілер полиция қызметінің ерекшеліктерімен танысып, арнайы бөлімшенің жұмысын жақыннан көруге мүмкіндік алды. Мұндай кездесулер жас ұрпақтың бойында патриоттық сезімді қалыптастырып, құқық қорғау органдарына деген сенімді нығайтуға және салауатты өмір салтын насихаттауға бағытталған.