СҚО-да балаларды уақытша орналастыруға арналған жаңа орталық ашылды, - деп хабарлайды kazlenta.kz тілшісі Polisia.kz сайтына сілтеме жасап.
Петропавл қаласында Солтүстік Қазақстан облысы әкімдігінің білім басқармасына қарасты кәмелетке толмағандарды бейімдеу орталығы өз жұмысын бастады. Салтанатты ашылу рәсіміне облыс әкімі Ғауез Нұрмұхамбетов, Солтүстік Қазақстан облысы полиция департаментінің бастығы Айдын Қабдұлдинов, сондай-ақ педагогтер мен сала өкілдері қатысты. Бұған дейін аталған орталық қала сыртында, Қызылжар ауданында орналасқан болатын. Бұл, әсіресе түнгі уақыттарда және демалыс күндері балаларды шұғыл орналастыру кезінде белгілі бір қиындықтар туғызған. Қазіргі таңда бейімдеу орталығы Петропавл қаласының орталық бөлігінде — полиция басқармасының ғимаратына жақын, Абай көшесінде, Kozybayev University оқу корпустары мен студенттік жатақханаларының маңында орналасып отыр.Жаңа орталықта 3 пен 18 жас аралығындағы балаларға арналған 30 орындық жеке бөлмелер жабдықталған. Мұнда тәрбиеленушілердің қауіпсіз әрі жайлы жағдайда тұруына, демалуына, бос уақытын тиімді өткізуіне, сондай-ақ медициналық және психологиялық көмек алуына барлық қажетті жағдай жасалған.Жыл басынан бері Петропавл қаласының полицейлері жоғалған балалар мен жасөспірімдерді іздеу бойынша 79 рет жедел шараларға жұмылдырылған. Әрбір осындай хабарлама дереу әрекет етуді талап етеді. Қала аумағында орналасқан бейімдеу орталығы ювеналдық полиция қызметкерлері мен педагогтер үшін төтенше жағдайларда маңызды қолдау тетігіне айналып отыр.
Салтанатты шара соңында өңір басшысы орталықтың қажеттіліктері үшін пайдаланылатын жаңа автокөліктің кілтін табыстады.