Атырауда "Сергек" жүйесінің көмегімен 4300-ге жуық құқық бұзушылық анықталды, - деп хабарлайды kazlenta.kz тілшісі Polisia.kz сайтына сілтеме жасап.
"Сергек" аппараттық-бағдарламалық кешені қоғамдық қауіпсіздікті қамтамасыз ету, құқық бұзушылықтардың алдын алу және жол қозғалысы қауіпсіздігін бақылау бағытында тиімділігін көрсетіп келеді. Бүгінде Атырау облысы бойынша 3582 "Сергек" бейнебақылау камерасы орнатылған.
Аталған жүйе жол қозғалысы ережелерін бұзуды анықтаумен қатар, қоғамдық орындардағы құқық бұзушылықтарды дер кезінде тіркеуге де септігін тигізеді. Сонымен қатар жалған мемлекеттік нөмір тағылған, техникалық байқаудан өтпеген немесе міндетті сақтандыру полисі жоқ көлік құралдарын анықтауға мүмкіндік береді. Жыл басынан бері Атырау қаласы бойынша "Сергек" жүйесі арқылы 4300-ге жуық құқық бұзушылық дерегі тіркелді, оның ішінде 2894 дерек жол қозғалысы ережелерін бұзу фактілеріне қатысты.