Алматы әкімі Дархан Сатыбалды Алатау ауданындағы Саялы шағынауында бой көтерген «ЖІГЕР» инновациялық шығармашылық және оқушыларды дамыту орталығының ашылу рәсіміне қатысты, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Халықаралық балаларды қорғау күні ашылған орталықта балалардың жан-жақты дамуына барлық мүмкіндік қарастырылған. Мұнда оқушылар робототехника, бағдарламалау, шығармашылық, спорт, ғылыми-зерттеу және жобалық жұмыстармен айналыса алады.
Ерекше білім беру қажеттілігі бар балалар үшін арнайы кабинеттер мен сенсорлық кеңістіктер жабдықталып, кәсіби психологиялық-педагогикалық қолдау көрсетіледі. Орталықта экология және заманауи агротехнология бағыттары да қамтылған. Осы мақсатта жылыжай, оқу зертханалары және тәжірибелік сабақтарға арналған арнайы алаңдар ашылған.