Алматы әкімі Дархан Сатыбалды Оқушылар сарайын аралады. Бұл – қаланың ең ірі қосымша білім беру орталығы. Нысан 1983 жылдан бері жұмыс істейді және спорт пен робототехникадан бастап экология, музыка және туризмге дейінгі бағыттарды қамтиды, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Қазіргі уақытта Оқушылар сарайында 15,1 мыңнан астам бала білім алады. 200-ден аса педагог оқу кабинеттерінде, зертханаларда, бассейні бар спорт кешенінде, планетарийде, обсерваторияда және шығармашылық студияларда сабақ жүргізеді. Дархан Сатыбалды орталықтың инфрақұрылымымен танысып, классикалық музыка және робототехника сыныптарын көрді. Әкім мұндай бағыттарды дамыту Мемлекет басшысының тапсырмаларына сәйкес келетінін және балалардың жан-жақты дамуына маңызды рөл атқаратынын айтты. Барлық бөлмелер тәулік бойы бейнебақылау жүйесімен, өрт дабылы және заманауи қауіпсіздік құралдарымен жабдықталған. Қала басшысы қосымша білім беру нысандарының материалдық-техникалық базасын одан әрі нығайту қажеттігін атап өтті.