Астанада берешегі бар жүргізушілерге рейд күшейтілді, - деп хабарлайды kazlenta.kz тілшісі Polisia.kz сайтына сілтеме жасап.
Елордада "Борышкер" жедел алдын алу іс-шарасы аясында құқық бұзушылықтарды анықтау және әкімшілік айыппұлдарды өндіру бағытындағы жұмыстар күшейтілді. Рейдтік іс-шаралар барысында 1000-нан астам әкімшілік айыппұл өндіріліп, берешегі бар азаматтарға қатысты тиісті шаралар қабылданды.
Полиция қызметкерлері мен жеке сот орындаушыларының бірлескен жұмысы нәтижесінде қарызды өтеуден жалтарған тұлғалар анықталуда. Сондай-ақ жеке сот орындаушысының қаулысы негізінде 41 жастағы азаматқа тиесілі, 68 млн теңгеден астам берешегі бар Porsche Cayenne автокөлігі анықталып, тоқтатылды. Аталған көлік заң талаптарына сәйкес мамандандырылған айыптұраққа қойылды. Полиция азаматтарды жол қозғалысы ережелерін және заң талаптарын қатаң сақтауға шақырады. "Заң мен тәртіп" қағидатын сақтау — қоғамдық қауіпсіздік пен тұрақтылықтың негізгі кепілі.