Түркістан облысында полицейлер қоғамдық қауіпсіздік пен жол қозғалысы тәртібін қамтамасыз ету бағытында жүйелі және нәтижелі жұмыс жүргізіп келеді, – деп хабарлайды kazlenta.kz тілшісі Polisia.kz сайтына сілтеме жасап.
Кезекті жедел әрекеттің нәтижесінде үйлену тойы кортежі кезінде болған өрескел құқық бұзушылықтардың жолы кесілді. Полицейлердің жедел әрі үйлесімді іс-қимылының арқасында арнайы қызметтік көліктерге тән жарқылдауық шамдарды заңсыз орнатып, жол қозғалысы ережелерін елемеген жүргізушілер қысқа уақыт ішінде анықталып, тоқтатылды. Оқиға Леңгір қаласының орталық көшелерінің бірінде тіркелді. Тәртіп сақшыларының кәсіби әрекеті нәтижесінде Toyota Camry 40 және ВАЗ-21115 автокөліктері тоқтатылып, жүргізушілердің заң талаптарын бұзғаны дәлелденді.
Құқық бұзушыларға қатысты заң талаптарына сәйкес қатаң шаралар қабылданып, автокөліктер айыптұраққа қойылды. Сонымен қатар полицейлер тарапынан жүргізушілерге түсіндіру және алдын алу жұмыстары жүргізіліп, жол қозғалысы ережелерін сақтаудың маңызы айтылды. Айта кетейік, жыл басынан бері Түркістан облысының полицейлері осындай 5 заңсыз кортежді анықтап, әрбір дерек бойынша жедел әрі нақты шаралар қабылдаған. Бұл өңірдегі құқықтық тәртіпті қамтамасыз етудегі жүйелі жұмыстың нақты көрінісі.