Алматыдағы Орталық ипподромда өткен Наурыз мерекесі ұлттық спорт түрлері бойынша екі әлемдік рекордтың тіркелуімен ерекшеленді. Алматылық спортшылардың бұл бірегей жетістіктері халықаралық төрешілер тарапынан ресми түрде бекітілді, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Динара Сайдалина желіп келе жатқан түйенің үстінде садақ атудан әлемдік рекорд орнатты. Сағатына 35,9 шақырым жылдамдықпен желіп, ол төрт нысананы да дәл көздеді. Екінші рекорд Ернар Жасұзаққа тиесілі: «Шабандоздық» дисциплинасында ол 43,3 км/сағ жылдамдықпен 500 метр қашықтықты ат үстінде тік тұрып, қолдың көмегінсіз еңсерді.
Спорттық бағдарламаны көрермендерге ерекше әсер сыйлаған көкпар турнирі толықтырды. «Жетісу» командасы алтын кубокты жеңіп алды. Сонымен қатар қала тұрғындары асық ату, арқан тарту және қазақ күресі сияқты ұлттық ойындарда бақ сынады.