Абай облысында экология талаптарын бұзған 2300-ден астам азамат жауапқа тартылды, – деп хабрлайды kazlenta.kz тілшісі Polisia.kz сайтына сілтеме жасап.
Абай облысында қоғамдық тәртіп пен экологиялық тазалықты қамтамасыз ету мақсатында республикалық "Таза Қазақстан" акциясы жүйелі түрде жүзеге асырылып келеді. Қалалар мен елді мекендерді абаттандыру қағидаларын сақтау, инфрақұрылым объектілерін қорғау, жасыл желектер мен саябақтарды бұзбау – акцияның негізгі міндеттерінің бірі болып отыр. Абай облысы аумағында жыл басынан бері абаттандыру қағидаларын бұзу, аумақтардың санитарлық жағдайын сақтамау және қалдықтарды рұқсатсыз орналастыруға байланысты 2316 құқық бұзушылық анықталды. Барлық деректер бойынша Қазақстан Республикасының заңнамасына сәйкес шаралар қабылданды. Қалалар мен елді мекендердің аумақтарын абаттандыру қағидаларын бұзу, инфрақұрылым объектілерін бүлдіру, жасыл екпелерді жоюдың – 2119 фактісі анықталды. Ортақ пайдаланылатын орындарды ластаудың – 197 фактісі тіркелді.
Құқық бұзушылықтардың көбі жедел басқару орталығы бейнебақылау жүйелері арқылы анықталды, бұл бұзушылықтарды жедел тіркеуге және тиісті әрекет етуге мүмкіндік береді. Полиция қызметкерлері тұрақты негізде профилактикалық іс-шаралар, рейдтік тексерулер және тұрғындармен түсіндіру жұмыстарын жүргізуде, олардың мақсаты — құқықбұзушылықтардың алдын алу және қоршаған ортаға жауапкершілікпен қарау мәдениетін қалыптастыру. Полиция тұрғындарды абаттандыру қағидаларын сақтауға және елді мекендердің тазалығын қолдауға шақырады, қоғамдық тәртіп пен экологиялық қауіпсіздікті қамтамасыз ету — қоғам мен құқық қорғау органдарының ортақ міндеті екенін атап өтеді.