«Таза Қазақстан» экологиялық мәдениетті дамыту тұжырымдамасы аясында 2025 жылы 31 іс-шара жүзеге асырылып, бағдарламаға 700 мыңнан астам ақмолалық қатысты, деп хабарлайды kazlenta.kz тілшісі Ақмола облысы әкімдігінің баспасөз қызметіне сілтеме жасап.
133 мың аула аумағында тазалау және абаттандыру жұмыстары жүргізіліп, 758 саябақ пен сквер, тарихи-мәдени ескерткіштер ретке келтірілді, шамамен 87 мың тонна қоқыс шығарылды. Облыс елді мекендерінде 182 мың ағаш отырғызылып, сондай-ақ Көкшетау және Степногорск қалаларында жасыл желектерге түгендеу жүргізілді.
2026 жылға да кем түспейтін көлемде іс-шаралар қарастырылған – 37 бастама жоспарланып отыр. Аумақтарды санитарлық тазалау, абаттандыру және көгалдандыру бойынша күнделікті жұмыстармен қатар, экологиялық құқықбұзушылықтарды анықтау үшін бейнебақылау камераларының санын арттыру, қалдықтарды сұрыптау және қайта өңдеу жобаларын іске асыру, экологиялық ойлауды қалыптастыру мен халықты тәрбиелеуге бағытталған ақпараттық және мәдени іс-шаралар өткізу көзделген.
Облыста «Таза қала», «Таза жағалаулар», «Таза жүгіру» акциялары, «Жасыл аула», «Жасыл соқпақ», «Өз ағашыңды отырғыз» атты ағаш отырғызу шаралары, байқаулар мен шығармашылық жобалар, мектептерде эко-сағаттар, сондай-ақ әлеуметтік акциялар мен интернеттегі флешмобтар өтеді.