Облыс әкімі Нариман Төреғалиев аудан орталығы – Тасқала ауылындағы су тасқынының алдын алу жұмыстарымен танысты, деп хабарлайды kazlenta.kz тілшісі БҚО әкімдігіне сілтеме жасап.
Деркөл өзені Тасқала ауылының ішімен ағып өтетіндіктен, жағадағы жұрт көктем сайын уайымға салынып, әбігерге түседі. Аймақ басшысының былтырғы тапсырмасына сәйкес, "Батыс ирригация" мекемесінің техникаларымен өзеннің айналма тұстары тереңдетіліп, кеңейтілді. Сондай-ақ тасқын кезеңінде ауылды су басу қаупін сейілту үшін ұзындығы 2 шақырым канал қазылды.
Атқарылған жұмыстарды жіті бақылаған облыс әкімі Деркөл өзені бойында каскадты су қоймасы салынатынын айтты.
Сапар аясында тасқынның алдын алу және салдарын жоюға жауапты қызметтердің дайындығы пысықталды. Облыс әкімі Нариман Төреғалиев техникалар мен құрал-жабдықтарды көріп, құзырлы құрылымдарға нақты тапсырмалар берді.