Синоптиктердің болжамы бойынша қыстың алғашқы айы жылы жаңбырлы болады деп күтілуде. Осыған байланысты Шымкентте су басу қауіпі бар аймақтар жіті бақылауға алынып отыр.
Қала әкімі Ғабит Сыздықбеков Төтенше жағдайлар департаментінің бастығы генерал-майор Қуанар Базарбаевпен бірге Шымкент қаласының су тасқыны қаупі бар жерлерге аэровизуалды мониторинг жүргізді.
Тікұшақпен ұшу барысында Бадам өзенінің бойында орналасқан Игілік, Қызылжар, Тәуелсіздікке 20 жыл елді мекендері, Текесу, Бадам, Тоғыс су қоймалары, жоғары Бадам су реттегіші және Сайрам-су өзенін барлау жұмыстары жүргізілді. Аэровизуалды мониторинг кезінде 6 гидротехникалық құрылыс нысандары зерделенді. Сонымен қатар, 2 өзеннің су ағысына шолу жасалды. Төтенше жағдайлар департаменті мамандарының сөзіне сүйенсек, алдағы уақытта су тасқынына қарсы жол картадағы 9 іс шара жүзеге асса, су басу аймақтарындағы қауіп сейіледі.
Әуеден бақылау барысында жағдай тұрақты екені байқалды. Өзендердің ағысы қалыпты. Бадам өзенінде секундына тоғыз текше метр, ал Сайрам суда 1 текше метр су ағуда. Су қоймаларының толу деңгейі 13–45 пайызды құрайды. Тасқын суларды қабылдайтын қоры жеткілікті. Су тасқынының алдын-алу барысы үнемі бақылауда болады,-деп мәлім етті сала басшылары. Қазір қала аумағындағы барлық учаскелердегі каналдар, ирригациялық жүйелер мұз бен қоқыстан тазартылды. Қала әкімінің тапсырмасына сәйкес, тәуліктік кезекшілік ететін штаб та ұйымдастырылады.