Абай облысында терроризм актісі туралы көрінеу жалған хабарлаудың 14 фактісі тіркелді, - деп хабарлайды kazlenta.kz тілшісі Polisia.kz сайтына сілтеме жасап.
Қоғамдық қауіпсіздік пен азаматтардың тыныштығын қамтамасыз ету - полиция қызметінің басты міндеттерінің бірі. Осы тұрғыда терроризм актісі туралы көрінеу жалған хабарлау қоғамға елеулі қауіп төндіретін, құқық қорғау органдарының қалыпты жұмысына кедергі келтіретін әрі азаматтардың өмірі мен денсаулығына қатер тудыруы мүмкін қылмыстық әрекет ретінде бағаланады.
Абай облысында 2025 жылы терроризм актісі туралы көрінеу жалған хабарлау деректері бойынша барлығы 14 қылмыстық іс тіркелген. Аталған істердің екеуі кәмелетке толмаған жасөспірімдердің әрекетіне қатысты. Мұндай жалған хабарламалардың салдарынан білім беру ұйымдары, мемлекеттік мекемелер мен қоғамдық орындардың жұмысы уақытша тоқтатылып, тұрғындар арасында үрей мен алаңдаушылық туындайды. Қазақстан Республикасының қолданыстағы заңнамасына сәйкес, дайындалып жатқан терроризм актісі туралы көрінеу жалған хабарлау қылмыстық жауаптылыққа әкеп соғады. Аталған құқық бұзушылық үшін бес мың айлық есептік көрсеткішке дейін айыппұл салу, сол мөлшерде түзеу жұмыстарына тарту, не бес жылға дейін бас бостандығын шектеу немесе сол мерзімге бас бостандығынан айыру жазасы көзделген. Бұл - мемлекеттің қоғамдық қауіпсіздікке төнетін кез келген қатерге мүлдем төзбеушілік танытатынының айқын дәлелі.
Терроризм актісі туралы жалған хабарлау кейде ойланбай жасалған әрекет немесе жауапсыздықтың салдары болып көрінуі мүмкін. Алайда оның құқықтық салдары аса ауыр. Мұндай қылмыс үшін кәмелетке толмаған тұлғалар да заң аясында жауапкершілікке тартылуы мүмкін, бұл өз кезегінде ата-аналар мен заңды өкілдерге де белгілі бір міндеттер жүктейді. Осыған байланысты Абай облысының полиция департаменті азаматтарды заң талаптарын қатаң сақтауға, жалған ақпарат таратудан бас тартуға және кез келген күмәнді жағдайлар бойынша тек шынайы әрі расталған мәліметтерді ғана уәкілетті органдарға хабарлауға шақырады. Қоғамдық тәртіп пен қауіпсіздікті сақтау - әрбір азаматтың ортақ жауапкершілігі.