Абай облысында полицейлер 32 келіден астам есірткінің заңсыз айналымын әшкереледі, – деп хабарлайды kazlenta.kz тілшісі Polisia.kz сайтына сілтеме жасап.
Абай облысы полиция департаментінің есірткі қылмысына қарсы іс-қимыл басқармасы Семей тұрғынының есірткі құралдарын заңсыз сақтап, өткізуімен айналысатыны жөнінде жедел ақпарат алды. Аталған дерек бойынша Қазақстан Республикасы қылмыстық кодексінің есірткі құралдарын заңсыз дайындау, қайта өңдеу, алу, сақтау, тасымалдау, жөнелту не өткізу фактілеріне қатысты бабы бойынша сотқа дейінгі тергеп-тексеру басталды. Есірткі қылмысына қарсы іс-қимыл басқармасы, "Арлан" арнайы бөлімшесі және Абай облысы ПД кинологиялық қызмет орталығы жүргізген бірлескен жедел-іздестіру іс-шаралары нәтижесінде қылмыс жасады деген күдікпен 51 жастағы семейлік азамат анықталып, ұсталды.
Тергеу мәліметтері бойынша, ол өз үйінің ауласында 10 000 теңгеге жедел сатып алуға қатысқан адамға өсімдік тектес зат салынған екі қағаз орамасын заңсыз сатқан. Сот-сараптама қорытындысына сәйкес, тәркіленген заттың жалпы салмағы 7,84 грамм болатын кептірілген марихуана екені анықталды. Кейінгі тінту шаралары барысында күдіктінің тұрғылықты жерінен ара, өсімдік тектес зат салынған бірнеше пакеттер мен картон қораптар, ерекше иісі бар жасыл түсті 57 түп өсімдік, есірткі қалдықтары бар кастрюля және өзге де заттай айғақтар, сондай-ақ жедел сатып алу кезінде пайдаланылған купюра тізбесіне сәйкес келетін ақша қаражаты анықталып, тәркіленді.
Сараптама нәтижесінде тәркіленген өсімдіктердің жалпы салмағы 32 келі 100 грамм болатын қарасора тұқымдасына жататын есірткі заты екені расталды. Бұдан бөлек, медициналық куәландыру күдіктінің каннабиноидтарды қолданғанын көрсетті. Қазіргі уақытта күдікті Семей қалалық полиция басқармасының уақытша ұстау изоляторына қамалды. Істің мән-жайын жан-жақты және объективті зерделеуге бағытталған тергеу іс-қимылдары жалғасуда. Полиция есірткі құралдарының заңсыз айналымын анықтау және жолын кесу бойынша пәрменді шараларды жалғастыруда.