Ақтөбеде екі күнде 17 мас жүргізуші анықталды, - деп хабарлайды kazlenta.kz тілшісі Polisia.kz сайтына сілтеме жасап.
Жол-көлік оқиғаларының алдын алу, жүргізушілер арасында тәртіпті күшейту және жол қозғалысы қауіпсіздігін қамтамасыз ету мақсатында 27–31 қазан аралығында Ақтөбе облысы аумағында "Қауіпсіз жол" атты жедел-профилактикалық іс-шара өтіп жатыр. Іс-шараның алғашқы екі күнінің қорытындысы бойынша полицейлер облыс аумағында 543 жол қозғалысы ережесін бұзу дерегін анықтады. Оның ішінде: – 21 жүргізуші қарсы бағытқа шыққан; – 26 жүргізуші жаяу жүргіншіге жол бермеген; – 55 жаяу жүргінші жол қозғалысы ережесін бұзған. Полиция қызметкерлері жолаушылар тасымалымен айналысатын көлік жүргізушілерінің тәртібіне де ерекше назар аударып отыр.
Тексеру барысында жолаушыларды тасымалдау ережесін бұзудың 14 дерегі, сондай-ақ заңсыз жолаушы тасымалдаудың 4 фактісі тіркелген. Сонымен қатар "Қауіпсіз жол" іс-шарасы басталғалы бері 17 мас жүргізуші анықталды. Әсіресе көлік жүргізу құқығынан айырылғанына қарамастан, мас күйде рульге қайта отырған азаматтарды анықтау және оларды жауапқа тарту бағытында жұмыс күшейтілген. Мысалы 27 қазан күні түнде Хромтау қаласында патрульдік полиция қызметкерлері жүрісі күдік тудырған Great Wall автокөлігін тоқтатты. Тексеру кезінде рульде болған 51 жастағы жергілікті тұрғынның бұған дейін, 2022 жылы мас күйінде көлік басқарғаны үшін 7 жыл мерзімге көлік жүргізу құқығынан айырылғаны белгілі болды.
Медициналық куәландыру қорытындысы оның тағы да алкогольдік масаң күйде болғанын растады. Осындай жағдай 28 қазан күні Самара – Шымкент республикалық автожолында да орын алды. Патрульдік полиция қызметкерлері тоқтатқан Kia Sportage автокөлігінің 39 жастағы жүргізушісі де мас күйінде болған. Тексеру барысында оның биыл, 2024 жылы да дәл осы әрекеті үшін 7 жыл мерзімге көлік басқару құқығынан айырылғаны анықталды. Аталған деректер бойынша Қазақстан Республикасының Қылмыстық кодексінің 346-бабы (Көлік құралдарын мас күйінде басқару) бойынша қылмыстық істер тіркеліп, көліктер арнайы тұраққа қойылды. Ал жүргізушілер уақытша ұстау изоляторына қамалды. Қолданыстағы заңнамаға сәйкес, көлік жүргізу құқығынан айырылған бола тұра, мас күйінде рульге отырған азаматтар 5 жылға дейін бас бостандығынан айырылуы мүмкін. Сонымен қатар олар өмір бойына көлік жүргізу құқығынан айырылатын болады. Ақтөбе облысы аумағында "Қауіпсіз жол" жедел-профилактикалық іс-шарасы жалғасуда. Полицейлердің басты мақсаты – жолдардағы тәртіпті нығайту, азаматтардың өмірі мен денсаулығын қорғау.