Республика күніне арналған салтанатты жиында Мемлекет басшысы Қасым-Жомарт Тоқаев бұл мерекенің Қазақстанның егемен мемлекет ретінде қалыптасуындағы тарихи маңызын атап өтті, деп хабарлайды kazlenta.kz тілшісі Ақордаға сілтеме жасап.
Президенттің айтуынша, Егемендік туралы декларация тәуелсіздікке бастау болған құжат болды.«Бұл күнді халқымыздың дербес ел болуына жол ашқан қастерлі күн деуге болады»«Еліміздің ең басты мерекесі – Республика күні құтты болсын! Ұлттық мейрам қарсаңында дәстүрге сай Ақорда төрінде мемлекетіміздің үздік азаматтарымен бірге жиналып отырмыз. Биыл еліміз азаттықтың мерейлі белесіне жетті. Осыдан 35 жыл бұрын Қазақстанның Егемендігі туралы декларация қабылданды. Дәл осы күні сан ғасырлық мемлекеттілік дәстүріміз қайта жаңғырды. Көп ұзамай жұртымыз Тәуелсіздік байрағын көтерді. Тарихи әділдік орнап, ұлттың рухы асқақтады. Сондықтан бұл күнді халқымыздың дербес ел болуына жол ашқан қастерлі күн деуге болады. Тәуелсіздік – бәрінен қымбат құндылығымыз. Оны сақтап, нығайта түсу – баршамызға ортақ қасиетті борыш. Егемендік – ата-бабаларымыздың ұлт мүддесі жолындағы өшпес ерлігінің айқын көрінісі», - деді Мемлекет басшысы.