KMG PetroChem компаниясы ҚР Президенті жанындағы Ұлттық ғылым академиясымен бірлесіп, елімізде карбамид өндіру жобасының ғылыми верификациясын бастады. Ынтымақтастықтың негізгі мақсаты – отандық тыңайтқыштың тиімділігін ғылыми тұрғыдан дәлелдеу және аграрлық сектордың өнімділігін арттыру, деп хабарлайды kazlenta.kz тілшісі ҚР Энергетика министрлігіне сілтеме жасап.
2025 жылы төрт өңірде 600 гектар алқапта карбамидтің далалық сынақтары басталды. Алынған деректер ауыл шаруашылығы өндірушілеріне арналған практикалық ұсынымдар әзірлеудің негізіне айналады.
Жоба шеңберінде Ақтөбе облысында қуаттылығы жылына 880 мың тонна карбамид өндіретін газ-химия кешенін салу көзделіп отыр. Жобаны іске асыру құрылыс кезеңінде шамамен 2000 уақытша жұмыс орнын, ал пайдалану кезінде 400 тұрақты жұмыс орнын құруға мүмкіндік береді. Бұл өз кезегінде Қазақстанды отандық тыңайтқыштармен қамтамасыз етіп, экспорттық әлеуетті күшейтеді.