Алматы әкімі Дархан Сатыбалды жұмыс сапары аясында «Нобел АФФ» АҚ, «Сайман корпорациясы» ЖШС және «Евразиан Фудс Корпорэйшн» АҚ кәсіпорындарында болды, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
«Nobel Алматы фармацевтикалық фабрикасында» әкім жоғары технологиялық дәрі-дәрмек шығаратын жаңа зауыт құрылысы жобасымен танысты. Жаңа кешенде 5 өндірістік цех, зертхана, қойма және әкімшілік ғимараттар салынады. Өндіріс қаланың Индустриалдық аймағына көшіріледі. «Сайман корпорациясында» 180 адам еңбек етеді, олардың басым бөлігі – жергілікті ЖОО түлектері. Кәсіпорынның жобалық қуаты – жылына 800 мың өлшеу құралы. Әкім қалада отандық өнімдерді кеңінен пайдалану мүмкіндігін қарастыруды тапсырды. «Евразиан Фудс Корпорэйшн» кәсіпорнында ауқымды қайта жаңғырту жұмыстары жалғасуда. Зауыт жылына 132 мың тоннадан астам өнім шығарады және өңірдегі ірі тамақ өнеркәсібі кәсіпорындарының бірі болып табылады.Жұмыс сапарының қорытындысы бойынша қала әкімі Алматының өнеркәсіптік әлеуетін дамытуға қолдау көрсетуді және шараларды күшейтуді тапсырды.
