Дархан Сатыбалды «Казлегпром-Алматы» тігін және аяқкиім фабрикасының қызметімен танысты. Кәсіпорын тәулігіне 1500 жұп аяқкиім және жылына 1,5 млн-ға дейін тігін бұйымын шығарады. Мұнда 650 адам еңбек етеді, олардың қатарында 50-ден астамы – ерекше қажеттіліктері бар азаматтар, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Сондай-ақ қала басшысы «Karina Paper» және «PAPIRONE» кәсіпорындарын аралады. Бұл компаниялар – Орталық Азиядағы қағаз өнімдерін шығаратын ең ірі өндірушілердің қатарында, нарықтағы үлесі 60%-ға дейін жетеді. Кәсіпорындарда 788 қызметкер жұмыс істейді. 2025 жылдың қазан айында компания жалпы аумағы 43,5 мың шаршы метр болатын логистикалық кешеннің құрылысын бастайды. Жоба аясында 260 жаңа жұмыс орны ашылады. Ал 2026 жылдың наурыз айында қағаз өнімдерін шығаратын төртінші өндірістік желінің құрылысы қолға алынады. Бұл бастама қосымша 100 жұмыс орнын ашып, экспорттық әлеуетті кеңейтуге мүмкіндік береді. Әкім атап өткендей, жұмысшы мамандықтарын дамыту, тұрғындарды тұрақты жұмыспен қамту және отандық өндірісті қолдау – Алматы дамуының негізгі бағыттарының бірі,-делінген хабарламада.