Алматы әкімі Дархан Сатыбалды Жетісу ауданындағы «Dragon City» тұрғын үй кешенінің тұрғындарымен кездесті. Негізгі түйткіл жерасты автотұрағының заңсыз қайта сатылуына, қазандықтың жиі істен шығуы мен трансформатор бекетінің жерасты үй-жайына орналастырылуына қатысты болды, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Әкім мұндай шешімді кім қабылдағанын және құжатқа кім қол қойғанын анықтауды тапсырды. Прокуратура және тиісті қызметтермен бірлесіп әрекет ету алгоритмі әзірленеді. Қажет болған жағдайда қауіптің алдын алу үшін трансформатор бекеті басқа жерге көшіріледі. Алдағы қысқы маусымда қазандықты арнайы мекеме қарамағына алып, халықты жылусыз қалдырмауға күш салады. Келер жылы қазандықты жаңғыртуға бюджеттен қаржы қарастырылмақ. Қала басшысының тапсырмасына сәйкес аудан көшелерінде жол белгілері мен жасанды кедергілер орнатылып, бейнебақылау камералары қойылады. «Халық қатысатын бюджет» аясында балалардың ойын алаңын салу мәселесі де назарға алынады, - делінген хабарда.