Түркістан облысында “Қарасора – 2025” жедел-профилактикалық шарасы шеңберінде полицейлер бір апта ішінде есірткіні сақтау мен тасымалдауға қатысты 7 деректі әшкереледі. Заңсыз айналымнан жалпы салмағы 20 келіден асатын есірткі заты тәркіленді, – деп хабарлайды kazlenta.kz тілшісі Polisia.kz сайтына сілтеме жасап.
Мәселен, Түлкібас ауданындағы Жамбыл облысымен шектес бекетте тәртіп сақшылары Кентау қаласының тұрғыны айдаған Toyota автокөлігін тоқтатты. Тексеру кезінде жүргізушіден 5 келіден артық марихуана салынған пакет табылды. Бұдан бөлек, Toyota минивэнін тексеру барысында Шымкент қаласының тұрғынынан 10 келіден астам есірткі анықталып, тәркіленді.
Аталған фактілер бойынша сотқа дейінгі тергеу амалдары жүргізіліп жатыр. Күдіктілер қамауға алынып, қазіргі таңда оқиғаның барлық мән-жайын анықтау үшін жедел тергеу шаралары жалғасуда.
Айта кетейік, “Қарасора – 2025” іс-шарасының басты мақсаты – есірткіні заңсыз сақтау, тасымалдау және өсіру деректерін анықтау, олардың жолын кесу және құрамында есірткі бар өсімдіктерді жою. Бұл бағыттағы жұмыстар алдағы уақытта да жүйелі түрде жалғасын табады.