Елорда туризмінің әлеуетін дамыту және өндірістік туризмді танымал ету мақсатында «Astana Tourism» туризмді дамыту орталығы қаладағы өндірістік кәсіпорындарда экскурсиялар ұйымдастыру жобасын қолға алды, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Жоба аясында өндірістік кәсіпорындар елорда қонақтарына – туристерге, инвесторларға және өзге де мүдделі тұлғаларға арналған арнайы экскурсиялық бағдарламалар әзірлейді. Жобаның негізгі міндеттерінің бірі – Астананың өнеркәсіптік секторының қалыптасу тарихымен және қазіргі дамуымен таныстыру, сондай-ақ оның инновациялық және технологиялық әлеуетін көрсету.Қаланың алты кәсіпорны өндірістік экскурсияларды ұйымдастыру бойынша оқыту семинарынан өтті. Олардың қатарында: тігін фабрикасы «Ютария», респиратор өндіретін «MFA International» зауыты, темірбетон конструкцияларын шығаратын «MODEX» зауыты, парфюмерлік өнімдер шығаратын «Аромат» кәсіпорны, жол және көпір қоршауларын өндіретін «СтальЦинк» зауыты және Астана электротехникалық зауыты «АЭТЗ» бар.Кәсіпорындар экскурсияларды ұйымдастыру әдістемелерімен, өндірістік нысандарда туристерді қабылдау стандарттарымен және үздік халықаралық тәжірибелермен танысты.
Сонымен қатар, жоба аясында қаладағы туристік қауымдастық өкілдерінің қатысуымен дөңгелек үстел өткізілді.Талқылаудың негізгі тақырыбы – өндірістік экскурсияларды қамтитын кешенді туристік пакеттерді қалыптастыру болды.Бұндай ынтымақтастық бизнес пен туроператорлардың күшін біріктіріп, бәсекеге қабілетті туристік өнімдер жасауға мүмкіндік береді.