Елордада жастарға тиімді шарттармен баспана алуға мүмкіндік беретін «Елорда жастары» бағдарламасы жүзеге асырылып келеді. Осы бағдарлама аясында баспаналы болған Лев Гумилев атындағы ЕҰУ-дың оқытушысы Балнұр Мамырбаева «Елорда жастары» туралы айтты, деп хабарлайды kazlenta.kz тілшісі қалалық әкімдіктің ресми сайтына сілтеме жасап.
2020 жылы Балнұр мен жұбайы бес жыл уақытқа жұмыс істейтін жастарға арналған жалдамалы пәтер алған. 2025 жылы бұл үйді босатуы қажеттігін білген олар мемлекеттік қолдаудың барлық мүмкін тетіктерін алдын ала зерттеуге кіріскен.
Ерлі-зайыпты әлеуметтік желілердегі жаңалықтарды жіті қадағалап, үй чатында бағдарламаның шарттарын талқылап, пайыздық мөлшерлемелерді салыстырған, мамандардан кеңес алып, өздеріне ең қолайлы ипотекалық бағдарламаға тоқталған.
Олар баспаналы болуды көздеген жастарға мынадай кеңес береді: алдын ала жинақ бастау және бірнеше жинақ шотын ашып, мемлекеттен көбірек сыйақы алу.
Несие мақұлданған соң, отбасы екінші нарықтан үш бөлмелі пәтер сатып алды.«Біз тек оң жағалауды қарастырдық, себебі ата-анамыз осында тұрады, әрі қолайлы. Ал екінші нарықтағы баспананы әдейі таңдадық, себебі жөндеу жұмысына кететін уақыт пен шығыннан қашқымыз келді. Күйеуім күні бойы жұмыста, ал мен балалармен үйде боламын», – дейді астаналық тұрғын.Балнұр Мамырбаеваның айтуынша, ең бастысы – қорықпай әрекет ету: • алдын ала ақша жинау және жинақ шоттарын ашу; • ресми дереккөздерден жаңалықтар мен бағдарламаның шарттарын қадағалау; • құжаттарды уақытында дайындап, менеджерлермен кеңесу; • қаржыны дұрыс жоспарлап, артық несие алмау.
Еске сала кетейік, «Елорда жастары» бағдарламасы Астанадағы жас мамандарға баспана алу үшін жеңілдетілген шарттар ұсынуды көздейді. Бағдарламаға елордада жұмыс істейтін, жасы 35-тен аспаған азаматтар қатыса алады.