Елордада жастардың баспана алуына көмектесетін «Елорда жастары» тұрғын үй бағдарламасы жүзеге асырылуда. Астаналық Қуандық Базар баспана алу жолын жария етті, деп хабарлайды kazlenta.kz тілшісі қала әкімдігінің ресми сайтына сілтеме жасап.
Қуандық бұл бағдарлама туралы елордалық Тұрғын үй қорынан білген. Бағдарламаға өтінім беруден бастап, өз пәтеріне қоныстануға дейінгі бүкіл процесс екі айдан аспаған.
«Алдымен құжаттарымыз тексеруден өтіп, Отбасы банкінен мақұлдау алдым. Содан кейін пәтер таңдап, серіктес банк арқылы ипотека рәсімдедім. Ең бастысы – барлық құжатты алдын ала дайындап, мерзімдерді мұқият қадағалау», – деді астаналық тұрғын.Ол бағдарлама бойынша өтінім беруді жоспарлап жүргендерге бірнеше пайдалы кеңес айтты.«Барлық құжатты алдын ала жинап, бағдарламаның шарттарын мұқият оқуға кеңес беремін. Сонымен қатар жаңалықтарды бақылап, өтінім беру сәтін жіберіп алмау маңызды. Әрине, жылдам шешім қабылдауға дайын болу керек, себебі жақсы пәтерлер тез өтіп кетеді», — деп кеңес берді қала тұрғыны.
Айта кетейік, «Елорда жастары» бағдарламасы 34 жасқа дейінгі жастарға жеңілдетілген несиелеу мүмкіндігін ұсынады. Қарыздың ең жоғарғы сомасы – 20 млн теңге, жылдық мөлшерлеме – 5%, бастапқы жарна – 10%. Баспананы бастапқы немесе нарықтан сатып алуға болады.