Алматыдағы «Алатау» театры Мәскеуде өткен XVII Чехов халықаралық театр фестивалінде сәтті өнер көрсетіп, көрермендер мен театр сыншыларын таңдай қақтырды. «Мәмлүк. Сұлтан Бейбарыс» спектаклі фестивальдің үздік қойылымдарының бірі деп танылды, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Саундрама жанрында сахналанған қойылым театрды, опера мен балетті бір сахнада тоғыстырды. Спектакльде 85 артист өнер көрсетті. Басты рөлдерді «Дарын» мемлекеттік жастар сыйлығының лауреаты Әсет Есжан мен Қазақстанның еңбек сіңірген қайраткері Ондасын Бесікбасов сомдады.Қойылымның режиссері Фархад Молдағали, ал сахналық көркемдеуін Нұрлан Төлешов жасады. Қойылым барысында театрдың этно-фольклорлық ансамблі жанды музыка орындап, ерекше дыбыстық партитура жасады.Айта кету керек, «Алатау» дәстүрлі өнер театры Қазақстаннан шақырту алған жалғыз ұжым. Қойылым екі күн бойы аншлагпен өтті.Фестивальден кейін театр әлемдегі ең айтулы театр фестивалі саналатын Off Avignon 2025 фестиваліне қатысу үшін Францияға жол тартады.
