2025 жылғы қаңтар–мамыр айларындағы деректерге сәйкес, Қазақстанда негізгі азық-түлік түрлерін өндіруде оң динамика байқалды. Бұл өңдеу өнеркәсібінің дамуын және еліміздің азық-түлік қауіпсіздігінің нығайып келе жатқанын көрсетеді, деп хабарлайды kazlenta.kz тілшісі ҚР АШМ баспасөз қызметіне сілтеме жасап.
Сиыр еті өндірісі 133,6 мың тоннаны құрап, 2024 жылдың осы кезеңімен салыстырғанда 0,4%-ға артты. Құс еті өндірісі 6,1%-ға өсіп, 157,7 мың тоннаға жетті.
Сүт өңдеу саласында да өсім байқалады: сүт өндірісі 3,9%-ға артып, 273,5 мың тоннаны, айран – 5,4%-ға өсіп, 37,1 мың тоннаны, сары май – 12,7%-ға көбейіп, 15 мың тоннаны құрады. Тауық жұмыртқасы 1,79 млрд дана көлемінде өндірілді, бұл өткен жылмен салыстырғанда 0,3%-ға көп.
Дәнді және майлы дақылдар өнімдері сегментінде айтарлықтай өсім тіркелді. Бидай ұны өндірісі 6,5%-ға артып, 1438,3 мың тоннаны, қарақұмық жармасы – 19,4%-ға (10,7 мың тонна), макарон өнімдері – 7,8%-ға (63,7 мың тонна) жетті.
Күнбағыс майы өндірісі 21,7%-ға өсіп, 334,5 мың тоннаны, күріш өндірісі 21%-ға артып, 84,5 мың тоннаны құрады.
Қант өндірісі 10 есеге артып, өткен жылғы 6,1 мың тоннадан 64 мың тоннаға дейін өсті. Тұз өндірісі 6,1%-ға өсіп, 169,3 мың тоннаны құрады.
Бұл көрсеткіштер елдегі азық-түлік қауіпсіздігін нығайтып, экспорттық әлеуетті кеңейтуге және ішкі агроөнеркәсіптік өндірісті дамытуға ықпал етуде.