Астана қаласының №8 мектеп-лицей аумағында орналасқан «ЖасЛандшафт – Табиғатты түлет!» атты экологиялық-шығармашылық ландшафттық бақтың ашылуы өтті, деп хабарлайды kazlenta.kz.
Аталған жоба «Жасыл әлем» жазғы лагері мен «Жасыл ел» бағдарламасы аясында жүзеге асырылып, 14-16 жас аралығындағы оқушылардың бір ай бойы еңбегінің нәтижесі болды.
Іс-шараға мектеп ұстаздары, оқушыларымен қатар №6 сайлау округі бойынша мәслихат депутаты Разбекова Ләззат Мұратқызы, Астана қаласының Әдістемелік орталығының маманы Жұмажанова Нұржамал Аманкелдіқызы және ҚР Оқу-ағарту министрлігі комитет төрағасының көмекшісі Батырхан Ерназ Әбдібайұлы арнайы қатысты. Қонақтар оқушылардың табиғатқа деген жанашырлығын, шығармашылық қабілетін жоғары бағалап, мұндай жобалар жас ұрпақтың экологиялық мәдениетін қалыптастыруда маңызды рөл атқаратынын атап өтті.
Бақтың жобасы ерекше мәнге ие – оның жалпы көрінісі күннің шуағын бейнелейді. Композицияның дәл жүрегінде күн энергиясымен жұмыс істейтін фонтан орналасқан, ол табиғатпен үйлесімді өмір сүру мен баламалы энергия көздерін қолданудың нышанына айналды. Ал күн сәулесі тәрізді тарамдардың шеткі бөліктерінде оқушылар мен ұстаздар пайдалы шөптер мен көкөніс дақылдарын еккен.
Мен — «Жасыл ел» бағдарламасы аясында еңбек етіп жүрген мектеп оқушысымын. Бүгін сіздерге біздің мақтанышымызға айналған ерекше жобамыз — «ЖасЛандшафт» бағы туралы айтып бергім келеді. Бұл бақ — жай ғана жер емес. Бұл — біздің қолымызбен жасалып жатқан еңбек пен шығармашылықтың шынайы нәтижесі. Біз мектеп жанындағы бос жатқан аумақты көркейтіп, оны табиғатпен үндескен, пайдалы әрі көркем аймаққа айналдыруды мақсат еттік. Жұмыс барысында бізге 10 тонна құнарлы қара топырақ қажет болды, топырақты шектеп, бөлшектеу үшін рейка ағаштарын пайдаландық, - дейді Сейлхан Ерали, 9 “г” сынып оқушысы.
Бұл бақ – тек табиғи өнім ғана емес, ол – жас ұрпақтың еңбегімен, шығармашылықпен жасалған болашаққа бағытталған жоба. Біз бұл жерді күнде күтіп-баптаймыз: суарамыз, қопсытамыз, арамшөптен тазартамыз. «ЖасЛандшафт» – бұл мен үшін жай бақ емес, бұл — табиғатпен диалог, еңбектің қуанышы, өз қолыңмен келешекке қалдырған із. Жасыл болашақ — өз қолымызда екенін сезінгенде, әрбір отырғызған гүл мен көшет жүрекке ерекше қуаныш сыйлайды, - дейді Ордабай Айша, 11-сынып оқушысы.
Жас экологтар мектеп ауласын көгалдандырып, арам шөптермен экологиялық әдістер арқылы күресті. Сондай-ақ, табиғи тастар мен ағаш элементтерін пайдаланып, ландшафттық дизайн жобаларын іске асырды. Игі бастама тек аула көркін арттыру ғана емес, балалардың табиғатқа деген жанашырлығын, шығармашылық қабілеті мен экологиялық мәдениетін дамытуға бағытталған.
Жобаның ұйымдастырушылары мен қатысушылары бұл бақтың келешекте қаладағы экобілім беру ісінің үлгісіне айналатынына сенімді. Ал оқушылар үшін бұл – табиғатпен үндестік табудың және нақты нәтиже арқылы өз еңбегінің құндылығын сезінудің жарқын мүмкіндігі. «ЖасЛандшафт – Табиғатты түлет!» - жас ұрпақтың табиғатқа деген жауапкершілігі мен сүйіспеншілігін арттыру жолындағы маңызды қадам.